Udaleku ibiltaria, egunpasak eta bestelako aisialdi jarduerak antolatu dituzte Zumaiako nerabeentzat

Kale Heziketa programako eta Gazteguneko hezitzaileek programazio bateratua antolatu dute udarako. Bi zerbitzuetan parte hartzen duten nerabe eta gazteak elkarren artean giro onean harremantzeko, eta zerbitzuok herri mailan ikusgarri egiteko, egitarau zabala prestatu dute udara begira.

Ekainean abiatuko dute egitaraua: hilaren 22an (asteartea) Zarautzera joango dira egunpasa; hilaren 25ean (ostirala) argazki rallya egingo dute herrian bertan; eta ekainaren 30etik uztailaren 2ra bitartean, Zumaiatik Ondarroarako bidea egingo dute herriko gazteek. Hortik aurrera, uztailean zehar askotariko ekintzetan parte hartzeko aukera izango dute.

Jarduera horiek guztiak doakoak izango dira, baina parte hartzeko beharrezkoa izango da aurrez izatea, pandemia egoera dela-eta aforoak neurtu beharko dituztelako. Izen-emateko, ondorengo bi telefonoetako batera deitu edo mezu bat bidaltzea nahikoa izango da:

GAZTEGUNEA: 688 612 940 | 633 467 132
KALE HEZIKETA PROGRAMA: 688 850 239

Honakoak dira elkarlanean antolatutako jarduerak (24 pertsonako aforoa egongo da saio horietan):

• Ekainak 25 (ostirala) | ARGAZKI RALLYA (19:00)
• Ekainak 30-uztailak 2 | UDALEKU IBILTARIA: ZUMAIA-ONDARROA
• Uztailak 8 (osteguna) | PIRAGUA
• Uztailak 15 (osteguna) | PADDLE SURF
• Uztailak 22 (osteguna) | SNORKEL (GETARIAN)

Bestalde, Gazteguneak bere programazio propioa ere osatu du. Ohiko programazioaz gain, honako irteerak antolatu dituzte (egunpasetan 20 pertsonak parte hartu ahal izango dute):

• Ekainak 22 (asteartea) | ZARAUTZERA EGUNPASA
• Uztailak 6 (asteartea) | DONOSTIARA EGUNPASA
• Uztailak 13 (asteartea) | MUSIKA EGUNA ZUMAIAN
• Uztailak 20 (asteartea) | ARBOLISMOA

Bizi dugun pandemia egoera dela-eta aldaketak izan daitezkeela kontutan hartuta, xehetasunak Instagrameko kontuan (@gaztetxola) zein Whatsapparen bidez zabalduko dituztela adierazi dute antolatzaileek.

Albiste erlazionatuak