Aurten ere egin errenta aitorpena euskaraz

2021/03/25
Herritar gehienek autolikidazio proposamena jasoko dute, eta garrantzitsua da onartzean euskarazko harremana nahi dela esatea. Aurtengo kanpainaren helburua % 30era iristea izango da.

Zumaiako Udalak ERRENTA AITORPENA EUSKARAZ egiteko kanpaina jarri du aurten ere martxan, UEMArekin elkarlanean. Horrela, euskarari bide berriak irekitzen zaizkio eta, bide batez, administrazioaren euskalduntzea ere bultzatzen da.

Urtez urte kopuruak gora egiten du, eta % 30era iristea izango da 2021eko kanpainaren helburua. Hona hemen aurreko urteetako datu batzuk:

 

2020an

2018an

2016an

2014an

2012an

Aitorpena egin zuten zumaiarrak

5.232

5.105

4.946

4.954

5.056

Foru Ogasunarekin harremanak euskaraz izatea eskatu zutenak

1.475

(% 28,19)

1.296

(% 25,38)

1.212

(% 24,50)

1.000

(% 20,19)

920

(% 18,19)

Hiru bide daude aitorpena egiteko eta guztietan erabil daiteke euskara: 

  1. Autolikidazio proposamena

  2. Mekanizatua

  3. Internet bidezkoa

Udaleko Euskara Zerbitzua harremanetan jarri da errentaren aitorpena egiten duten aholkularitza zerbitzuekin eta toki hauetan lagunduko dizute aitorpena euskaraz egiten:

AM aholkulariak

ainhoa.amasesores@gmail.com

943 862609

Unanue aholkulariak

unanue@unanue.eus

943 860960

Zumai aholkularitza

info@zumai.com

943 862624

Hala ere, kontuan hartuta gaur egun herritar gehienek autolikidazio proposamena jasotzen dutela, horri eman nahi izan zaio aurten ere garrantzia. Autolikidazioa onartzerakoan (telefonoz deituta edo internet bidez) euskaraz nahi duzula esanez gero, hortik aurrera hala etorriko zaizkizu Ogasunaren komunikazioak. Apirilaren hasieran bidaliko ditu Aldundiak proposamen horiek, eta apirilaren 12tik aurrera onartu ahal izango dira. Errenta mekanizaturako hitzordua apirilaren 16tik ekainaren 8ra bitartean eskatu ahal izango da, eta kanpaina orokorra aurten ekainaren 30an amaituko da. Argibide gehiago Ogasunaren webgunean. 

Beste zerga batzuetan ere euskaraz!

 Gipuzkoako Foru Aldundiak lau urteko egitasmo bat abiarazi zuen iaz, eta epe horren bukaeran hauxe lortu nahi dute: Ogasunarekin euskaraz egitea aukeratu duten gipuzkoarren kopurua 100.000 lagunera iristea (gaur egun 80.500 inguru).

Horregatik, «Ogasunarekin euskaraz» logoa gehituko dio Zumaiako Udalak kanpainarekin lotutako euskarri guztiei, UEMAko Gipuzkoako gainerako herrietan bezala.