Martxoaren 19an aurkeztuko dute 'Zirta', 13-17 urte bitarteko gazteentzako espazio askea

Gazteguneko gazteek, Eihera kooperatibako kideek eta Zumaiako Udaleko ordezkariek Zirta espazio berriaren nondik norakoak aurkeztu dituzte gaur goizean. 13 eta 17 urte bitarteko gazteei zuzendutako espazio berri bat sortu dute, gazteak LGTBIfobiarik eta matxismorik gabeko espazio askea eduki dezaten. Hilabetean behin bilduko dira gazteak, eta Eiherako kideak izango dituzte bidelagun.

Zirtako kideen arabera "konfidantzazko gunea izango da, zalantzak argitzeko eta elkarrekin ikasteko espazio aske bat". Aurkezpen irekia martxoaren 19an egingo dute, 19:00etan Hogarrean.

Espazio berri hau iaz Zumaiako Udalak sustatutako LGTBI eraldaketa prozesuaren emaitzetako bat dela azaldu du Maider Alberdi zinegotziak. 2020an zehar barne mailako lanketa egin zuen Eihera kooperatibak, batez ere bi zentzutan: alde batetik, udaleko hainbat sail aztertu zituzten; eta bestetik, gazteekin LGTBI kolektiboaren problematika lantzeko saioak egin zituzten.

Gazteekin egindako saioak oso emankorrak izan zirela uste dute Eiherako Iñigo Etxezarreta eta Laura Muelas, eta “gazteak gaia lantzeko gogoz zeudela ikusita", espazio berri hau sortzeko lanketa abiatu zuten haiekin batera. Halaber, udalaren barruko zenbait sailen azterketa egin du Eiherak, eta hainbat formakuntza saio egin dituzte, LGTBI kolektiboaren inguruko sentsibilizazioa udal zerbitzuetan txertatzen hasteko.

Albiste erlazionatuak